Sa Tulong ni Ginoong Elmar Regencia, School Principal of Pakpak Lawin Elementary School Outreach

Ang Pakpak Lawin Elementary School ay isang pampublikong paaralan na matatagpuan sa mataas na bahagi ng kabundukan na sakop ng Brgy. Malayong, Gloria Or. Mindoro, kung saan kailangang tumawid sa humigit-kumulang 30 ilog bago marating. Ang mga mag-aaral dito ay pawang katutubong Mangyan, partikular mula sa tribong Buhid, at may isa pang tribo na nasa isang oras pang lakad mula sa paaralan – ang tribong Bangon. Ang kanilang lugar ay mas liblib, at madalang ang pakikipag-ugnayan nila sa ibang tribo.

 

Ang pangunahing produkto ng mga pamilyang naroroon ay saging. Sa ngayon, wala pa silang konkretong daan, ni rough road man lamang. Tanging paglalakad o truck lamang ang maaaring gamitin kung mababa ang tubig sa mga ilog na dinaraanan. Ang mga guro na nagtuturo dito ay kadalasang lingguhan o buwanan kung umuwi, dahil sa matinding hirap ng biyahe. Sa kabutihang-loob ng BIBO & SHUN FOUNDATION INC., sa tulong ni Sis Joy Balauta at ng Filipino Community ng Nisio Catholic Church, Kariya Catholic Church, at Anjo Catholic Church sa Aichi Prefecture, Japan – isang balikbayan box na naglalaman ng mga bagong at gamit na sapatos, laruan, school supplies, damit, at iba pang gamit ang matagumpay na naipadala at naipamahagi sa mga magulang at mag-aaral ng paaralan. Lubos din naming pinasasalamatan ang Murakami Cargo para sa libreng shipment ng mga donasyon. Maraming-maraming salamat po sa lahat ng tumulong at patuloy na sumusuporta sa mga layunin ng aming foundation para sa mga kababayan nating katutubo sa liblib na lugar.